Rashin Kishi: Sanatoci sun amince da jinginar da aikin samar da wutar lantarki

Kwamitin majalisar dattawa mai kula da harkokin wutar lantarki da ma’aikatar wutar lantarki ta tarayya sun amince da jinginar aikin samar da wutar lantarki mai karfin Megawatts 700 na Zungeru domin hakan zai yi amfani ga Najeriya.

Ministan wutar lantarki, Abubakar Aliyu, wanda ya bayyana a gaban kwamitin majalisar dattawa mai kula da wutar lantarki a karkashin jagorancin Sanata Gabriel Suswam, yayi nuni da cewa bankin Exim na China da gwamnatin Najeriya ne ke ɗaukar nauyin aikin wutar na dam din Zungeru.

Ya kuma yi nuni da cewa, anbi duk wani kyakkyawan tsari da ka’idoji don tabbatar da cewa Najeriya bata yi asara ba a cikin yarjejeniyar.

Aliyu ya bayyana cewa har yanzu ayyukan samar da wutar lantarki mallakin gwamnatin tarayya ne, kuma wannan jinginar ta tsawon shekaru 30 ne kawai.