Dokar zaman gida: Muna asarar sama da naira biliyan 10 duk ranar Litinin – Gwamna Mbah

Gwamnan jihar Enugu, Peter Mbah, ya ce zama a gida da wani bangare na masu fafutukar kafa kasar Biafra a yankin Kudu maso Gabas ke tilasta wa ƴan jihar ya sanya jihar tana asarar sama da Naira biliyan 10 a duk ranar Litinin.

Gwamnan ya bayyana hakan ne a ranar Alhamis a Enugu, a wani taro da ya yi da shuwagabannin kananan hukumomin jihar.

Ya ce ana yin asarar kudin ne saboda ayyukan tattalin arziki da ake hana yi kowace Litinin saboda dokar zama a gida ba bisa ka'ida ba.

“Yana da mahimmanci a gare mu mu fahimci alaƙar da ke tsakanin talauci da wannan abin da ake kira dokar zaman-gida. Duk ranar Litinin da muka zauna a gida, muna asarar sama da Naira biliyan 10 daga ayyukan tattalin arzikin da ya kamata su faru a nan jiharmu,” in ji Mbah.

"Mutanen da galibi za su zauna a otal har zuwa Litinin kafin su yi tafiya za su yanke shawarar tafiya ranar Lahadi. To, me zai faru? Kudaden shiga da masu otal za su samu ya tafi."

"Mutanen da za su shigo Enugu don shiga harkar tattalin arziki ba za su zo ba saboda kun ce kuna zaune a gida ranar Litinin."

A cewarsa, tunanin rashin tsaro da dokar zaman gida ke haifarwa zai kawo cikas ga shirin gwamnatinsa na tafiyar da tattalin arzikin jihar