Majalisar dattijai za ta binciki yadda Gwamnatin Buhari ta cefanar da filayen tashi da saukar jiragen sama

Majalisar dattijan Najeriya ta soki gwamnatin shugaba Muhammdu Buhari bisa jinginar da filayen tashi da saukar jiragen sama na Abuja da Kano.

Wannan ya biyo bayan ƙudirin da Sanata mai wakiltar yankin  Kano ta Kudu, Hon Sulaiman Abdulrahman Kawu Sumaila ya gabatar a zauren majalisar ranar Alhamis.

Ƴan kwanaki kafin cikar wa’adin Gwamnatin Buhari ne dai aka jinginar da tashar jiragen sama ta Nnamdi Azikiwe dake Abuja da ta Malam Aminu Kano dake Kano.

A lokacin ma’aikatar sufurin jiragen sama ta ce jinginar da tashoshin zai samar wa da gwamnati kuɗin shiga da ya zarce dala biliyan hudu, haka kuma zai taimakawa Najeriya wurin inganta harkokin sufuri.

Sai dai Sanata Kawu Sumaila ya ce an jinginar da tashoshin ne cikin gaggawa ba tare da bin ƙa’ida.

Don haka ya buƙaci gwamnatin tarayya ta soke yarjejeniyar domin bawa  dukkan masu ruwa da tsaki su shiga ayi da su.

Haka kuma ya buƙaci Majalisar ta sa kwamitinta na sufurin jiragen sama ya binciki yadda aka jinginar da duk wata tashar jiragen sama.

Majalisar Dattawan ta amince da wannan ƙudirin nan take, kamar yadda jaridar Aminiya ta rawaito.