Majalisar Ɗinkin Duniya ta amince da ƙudurin hana nuna ƙiyayya ga addini

Hukumar kare hakkin bil'adama ta Majalisar Dinkin Duniya ta amince da wani kuduri ta zai yi hani ga nuna kiyayya ga addini a wani martani ga kona al-Qur'ani da aka yi a ƙasar Sweden a makon da ya wuce.

Pakistan ce ta gabatar da ƙudurin, inda ta ce gwamnatoci na bari ana wulakanta littafi mai tsarki na mabiya addinin musulunci.

An bukaci kasashe da su samar da dokoki waɗanda za su hana faruwar hakan, da kuma hukunta waɗanda aka samu da irin wannan laifi.

Ƙasashen dai ƙasashen yamma, ciki har da Amurka da Birtaniya da kuma kasashen Kungiyar Tarayyar Turai suka nuna adawarsu ga matsayar.

Sun ce matakin ya yi kutse ga ƴancin fadar albarkacin baki.