Jihohi 30 za su fuskanci ambaliyar ruwa mai tsanani, in ji gwamnatin taraiya

Jihohi 30 za su fuskanci ambaliyar ruwa mai tsanani, in ji gwamnatin taraiya 

Hukumar Kula da Kogi da Tafki  ta Ƙasa (NIHSA) ta bayyana cewa al’ummomi 1,249 a cikin jihohi 30 da babban birnin tarayya Abuja na cikin haɗarin ambaliyar ruwa mai tsanani.

Hukumar ta ƙara da cewa al’ummomi 2,187 da ke cikin ƙananan hukumomi 293 su ma suna cikin jihohin da ke fuskantar haɗarin ambaliya a matsakaicin mataki.

Da yake magana a Abuja ranar Alhamis yayin ƙaddamar da hasashen ambaliya na shekara ta 2025, Ministan Ruwa da Tsabtace Muhalli, Joseph Utsev, ya ce ambaliya na ɗaya daga cikin manyan bala’o’in da ake fama da su a Najeriya, kuma sauyin yanayi yana ƙara tsananta faruwar ta.

Utsev ya bayyana cewa jihohin Abia, Benue, Lagos, Bayelsa, Rivers da Jigawa na daga cikin muhimman wuraren da ake sa ran za su fuskanci ambaliya mai tsanani.

Ya ce hukumar ta kuma ƙaddamar da wani sabon shiri na hasashen ambaliya da ke mayar da hankali kan kowane yanki da ƙauyuka daban-daban a faɗin ƙasa.